رد على الشاعر عوض بن زاكي الحربي

[رحــال]

ياراكب اللي فوق باديه غباره=أبيض يشادي لون صفو الحراير
ألفين وخمسه من الخليج احتضاره=ورسمة شطرطونه جناحين طاير
وسكب الجنوط مع الرفارف مهاره=ماهو بتوليف الورش للبواير
ماداج مره وسط سيبن وحاره= ماياقف الا في طويل الزباير
ماياهبه راعيه لو هو استعاره= ولايتركه لمدوجين الحضاير
صمم تونتي فور بلف بشطاره= من قوته ماله شبيهن مغاير
لاناش الاول ثم فز بااثاره= خطرن يشق القاع ضغط التواير
ياراكبه لادست اضبط غياره=ولاتمشي الا وزيت الانجن معاير
مع وادي الصفراء توجه وداره= افطن وحاذر من ركون الحداير
وملفاك دارن فيه للعز شاره= دار النبي من قبل تبنا العماير
ومنصاك بيت مطوعين المهاره= لابة بني جابر سهوم النظاير
ليا وصلت وشفت ضو المناره= سمرن لهبها يصطلي له سعاير
لاهو بحاره ولا موازن اشاره= ولا هو بخافي وسط زحمة حواير
مايجذبك للبيت وصف وعماره= مايشدك الا كيف ريحه عطاير
مايجذبك ياكود ريحة بهاره= ونجرن يدقه مثل صوت النذاير
وتلقا عوض للضيف بوجهه بشاره= معزبن يبدي الفرح والبشاير
رجلن عليه الطيب ناظم زراره=عوض ولد زاكي طويل الشباير
ثم ساق لك كيفن يشوق صفاره= ماهو بكيف محششين الزقاير
بيمينه الفنجال ودله بيساره= وبرني قدوعه كبر مرو الخباير
ثلاث من رسلان بايمن وجاره= وبرادها من جنبها تو فاير
وليا تقهويت وطلبك العباره= عطه الجواب اللي من القلب ثاير
يامرحبا في جار يشكي لجاره=شرح لي احواله ومافالضماير
شاعر طروق القاف ضابط مساره= سباح ماهر فالبحور الغزاير
مايحتوي قافه هزال وعياره=وحامي بيوته من عسار وكساير
ان كان تبغا من السمين استشاره= ابشر براين ماش عقبه جباير
قريت خطك بين تاره وتاره=وعرفت من خطن لفا ويش صاير
ان كان ذايق يابن زاكي مراره= وعايش مثل ماقلت عيشت عزاير
وان كان حالك زايدن في دماره= ومحاولاتك كل ابوها خساير
اعرف ترى وقتك يغث اختباره= احذر تعثر لو تزيد العثاير
ترى الكباير مبتداها شراره= وترى الصغاير فالنهايه كباير
وانته رجل والرجل يخفي بواره= عن ناس تشقا بالعلوم الصغاير
وان كان حب الزين زاد استعاره=في ضامرك والحب بلوى وجاير
اصبر عسا بالصبر تجلا العساره= واجحد وكابر لو تهل العباير
ولو كان مادارك قريبه لداره= لابد من يومن تدور الدواير
ويجيبك الله صدفتن في دياره=على مثل ماقلت طرقي وزاير
تنفعك مرتها ولا هي ثباره=والبيت لو شفته يطفي الحساير
ان كان تدري عنك مالك مشاره= سوق القدم واحرص بذات الظفاير
الحب ماهو عيب ولاهو عياره=مقصد شرف مقصدك ولاحدن يعاير
حبن تقاسمتوه وزان انشطاره= على زواله لو سعا فيه باير
مايمكن انه لو فراسه نعاره=يفرق القلبين لو هو مساير
وان كان عيوا رد ثارك بثاره= ترى حلاة الشي عقب المراير
اركض وثابر وحلها بالجداره =واحذر تصيح تقول ناشب وحاير
وان كان ماتدري فهاذي الخساره= يحسن عزاك الله فمجمول ذاير
انسه ولو حاولت يوم افتكاره=تراك بابهامك تفج البصاير
جاك الكلام موثقن في قراره= من شاعرن مااوذاه حفظ السراير
ان جازلك جود عليه الستاره= وان ماعجبك ارمه بوسط السعاير



قصيده من الاخ والصديق الشاعر عبدالله السمين