غني عشان عندهم بساط..سبحان الله [الأرشيف]

مشاهدة النسخة كاملة : غني عشان عندهم بساط..سبحان الله

..ili.ReMa_aL.ili..

27-01-2005, 09:54 PM

بسم الله الرحمن الرحيم...
في عندي قصه بسيطه ابغا اقولكم هيا...هيا في الحقيقه مو قصة بس موقف بسيط صار والصراحه هزني شويه
وهذي القصة كتبتلكم هيا بالنص......ايش تقول القصه؟
هيا عن واحد يتيم مكافح مات ابوه وهوا عمرو 5 سنين وهوا اكبر اخوانوا..المهم هادا اليتيم بطل دراسه وراح اشتغل عشان يجيب لقمة العيش لامو واخوانو....
الموقف اللي صار واللي ابغا اقولوا انو في يوم من الايام نزل مطر شديد وعلى فكره كانوا عايشين في جده وفي حارة اليمن طبعا زمان وانتو عارفين كيف بيوت زمان من الحجر المنقبي والخشب ويلا الخراج ...المهم
هدول الناس كانو فقراء وماكان في بيتهم شي يجلسوا عليه الا بساط...المهم ولمن نزل في داك اليوم مطر شديد في جده
والبيت حقهم اتملى مويه قامت ايش سوت الام؟
.....جابت البساط هدا ولمت عيالها تحتوا عشان تحميهم من المطر...
قام ايش قال هدا الولد لامو ....وهوا لسا كان عمرو 10 سنين بس...قلها كلمة.... مره قويه ...
قلها ياامي احنا الحمدلله عندنا بساط نتغطا بيه من المطر بس كيف الناس الفقراء المساكين اللي ماعندهم بساط؟.......شايفين كيف اعتبر نفسهم من الاغنياء عشان عندهم بساط وهما اصلا كانو بالقوه يجيبوا لقمة عيشهم....
يعني احنا مالنا الا نقول الحمدلله على كل شي وعلى كل حال...
وللمعلومية فقط هدا الولد اشتغل كل شي مساح وكناس وخدام عشان يعيش اهلو
وكبر ولاقا شغلانه محترمه واتزوج وخلف والحمدلله
وعمرو دحين 63 سنه تقريبا (الله يديه طولة العمر) وحالتو ميسوره والحمدلله.....
الله يوفقوا دنيا واخره...دعواتكم ليه...انشاءالله تكون عجبتكم و تاخدو العظه منهاوتكون فيها اللي يحمس الشباب على العمل ايا كان..
تحيتي للجمـــــــيع..

كتكوت مفلوت

28-01-2005, 12:24 AM

.:. بس بالله عليك يا عنون كتكوت .. رموووووووولة .. في أيامنا الحين في احد يرضا انه يشتغل كناس ولا فراش ولا خدام .:. كل واحد يشوف نفسه فوق .:. يعني ولا حتى يفكر انه يروح يشتغل في سوبرماركات يقول لا كل الناس تشوفني ويعيبوا علي .:. اش تبغى الوظيفة تجي الين عندك .:. الله المستعان .:.

.:. موضوع تشكري علي .. بصراحة مو بس هذا الموضوع الي تشكري علي كل المواضيع تشكري عليها .:.

بنت النور

28-01-2005, 06:10 AM

الرائعة ..... رمال
قصتك فيها الكثير من الآلام والأمال .....
فالحياة لا تواجه إلا بمثل ..... تلك النفوس ......
القنوعة .... الراضية ..... المرهفة الحس بغيرها ...... ولو كان بهم ما بهم ....
لك مني أرق التحايا ....

الناقد

28-01-2005, 08:27 AM

رمااااااااال

إبداعاتك لاتنقطع .......

ما شاء الله عليكِ ......

والقصص دوما يؤخذ منها العبر .......

وفي قصتك الكثير من العبر .....

أن الغنى غنى النفس ......

وأن القناعة والرضا كنز كبير للإنسان ......

وأن من يجد قوت يومه لا يعد فقيرا بل يحمد الله على ذلك ......

ولكِ مني خالص التحايا

| | فرآسنشينو ..

28-01-2005, 10:22 AM

الأاخت العزيزة رمال
أشكر قصتك التي يأخذ منها الإنسان
من الأمل تاااااااارة ومن الغنى تااااااارة أخرى
فأبينتِ أن الأمل موجود أينما كنا هنا أوهناك
في الفقر نحن مأموولين وفي الغنى نحن محاسبين
وأبينتِ أن الغنى ليس غنى المال بل الغنى غنى النفس والقناعة
وانه ليس عيبا أن نعيش في قش أو حتى في الشارع
وأن الإنسان غير مهمل أو بعيد في الهوى
ولكن الله لا يهمل ولا ينسى أي انسان في مجازاته
وحتى الغني بالمال فهو مسؤول عن الفقراء بالصدقة والزكااااااة
وإلا فسيجازى من الله على الإهماااااااااال
وبصراحة أعطيتنا يا رمال من العبر أفضلها
وأن أي عمل ليس عيبا وشكرا....نانوووك

..ili.ReMa_aL.ili..

29-01-2005, 06:07 PM

مشكور عزيزي..كتكوت على مرورك

والله يعطينا خير نفسنا وترا الدنيا سارت بس مظاهر

محد سار يفكر غير في كلام الناس ومايفكر في مستقبله

ياسيدي مشكور على المرور..والله المستعــــــــــــــــــــان

..ili.ReMa_aL.ili..

29-01-2005, 07:50 PM

مشكورة يابنت النور على مرورك الكريم
وكلامك الجميل الذي يبعث للنفس السرور

عزيزي الناقد مشكور يا اخي الكريم على مرورك
وكلماتك الجميلة وكما قلت فالغنى غنى النفس والروح

اخي العزيز كونان
مشكور على عطرك الفواح وكلماتك الجميلة